Fjarlægið umbúðir

Ég hélt að á flestum pakkningum stæði "Fjarlægið umbúðir fyrir matreiðslu". Það á greinilega ekki við um fuglabúr.

Kviknaði í fuglabúri og þvotti

Hlekkjaður og mýldur

Litlum gáfum gæddur,
bleikum hlekkjum klæddur
asnaðist
í fangavist
mýldur bæði og mæddur.

Dæmdur í fangelsi fyrir að stela bleikum múl

Hvert skal halda?

Þetta er nýnæmi fyrir mér. Hef greinilega misst af ýmsu á mínum uppvaxtarárum. 

Hvert skal förinni heitið,
um næstu helgi?
Sendið mér skeyti og reytið
til áfengi handa svelgi.

Lögreglan segir „SMS" hátíðina framundan

Hardcore hitchhiker

Ég má til með að skipta yfir í ensku fyrir þessa fyrirsögn. Kostulegt ævintýri sem manngreyið rataði í. Sem betur fer varð honum ekki meint af.

Brunað eftir hraðbraut í hjólastól á 80 km hraða

Lofað upp í ermina

Ef ég væri Kristján, yrði svar mitt bein tilvitnun í texta Jónasar Friðrikssonar, Og ég trúi því.

Minn flokkur, hefur staðið við þau loforð, sem hann hefur gefið því fólki, sem hann hefur gefið þau loforð, að efla slík loforð.

Segir kosningaloforð um Vaðlaheiðargöng svikið

Æi, ekki aftur!

Fyrir ári síðan átti einmitt ámóta atburður sér stað, nema þá bar uppstigningardag upp á þann 25. maí, en ekki 17. Ætli það sé eitthvað við þennan dag, svona svipað og fullt tungl og varúlfar?

Alvarleg líkamsárás á uppstigningardag

Fólkvangur

Ég veit ekki hve þarft framtak þetta var, en það truflar mig lítið. Ég gekk þarna um svæðið fyrir all mörgum árum, upp að Hraunsvatni og jafnvel örlítið lengra. Fallegt og kyrrlátt. Mér leið eins og ég hefði einangrast frá skarkala veraldar. Það var notaleg tilfinning.

En ógn er ég orðinn þreyttur á orðinu fólkvangur eftir að lesa þessa grein. Kíkjum á síðustu málsgrein:

Óheimilt er að spilla gróðri og trufla dýralíf í fólkvanginum. Óheimilt er að hrófla við eða skemma á annan hátt jarðmyndanir og aðrar náttúruminjar í fólkvanginum. Óheimilt er að rækta framandi plöntutegundir í fólkvanginum. Öll meðferð skotvopna er bönnuð í fólkvanginum, en umsjónarnefnd fólkvangsins getur veitt heimild til að veiða refi og minka í fólkvanginum ef sérstök ástæða þykir, en ætíð í samræmi við lög um vernd, friðun og veiðar á villtum fuglum og villtum spendýrum og verndaráætlun.

Jörðin Hraun í Öxnadal friðlýst